طف الظلام
- الصفحة الرئيسية
- الاشعار
- المساجلات والردود
- طف الظلام
طف الظلام بنور بسمتك طَفّه
إضحك مَعَاي وبدد الليل بشـروق
زِفْ البَها والملح والزين زِفّه
خَلْ اتمتع بالنظر فيك وافوق
في جنة العشاق خّلْ نْتنفّه
بين الهوى والحب والود والشوق
رفه عن المهموم يا خل رفّه
خل السعادة تدخل القلب ويروق
كِفّتْك عندي ترجح بكل كِفَّه
ومالك عديل بناظري يا أدعج الموق
يا نور قلبي يا غرامه وشَفّه
كم لي وأنا من ضيقة الصدر مخنوق
وعدتني والوعد يا زين وَفّه
ثوب الصبر مني تفتق ومشقوق
كِلٍ ملا من نهر الآمال كفَّه
وأنا على نار الرجا فيك محروق
يا بو محمد صرت في عرض هَفّه
لا عاد لي رجعه ولا روحةٍ فوق
وأنت الدليل اللى عرجت المطَفّه
كيف العمل لا من نشف حلق وعروق
شف في طريقه كان للدرب لَفّه
أنا نشبت وباب الافراج مغلوق