يا رجا وين ربي جابني في نمار
وعام الأول بعيد وصافيٍ مشـربي
اشتكي لك من اللي حط حالي دمار
يا رجا كلما ونيت زاد اعطبي
خذني الله يكافي فوق عجل المغار
ثم أوقد على راسي هشيم احطبي
والله إني حظيظ ماب حظي ثبار
وما تهوشل مع السندا السناد اقربي
ان بغيت أرمي الشارة ركبت العيار
بم تاج القصيرة ما انقل المغربي
احبي واتوهف صيد ظبي القفار
لكن اعيونه اسـرع من سـريع ندبي
حط فيني خطام وحط فيني عذار
ثم لولس طرف حبلي على الغربي
حط فيني قياد وحط فيني هجار
وأذرع بثالثٍ خلاه فوق اركبي
أتيامن ولكنه يعود يسار
كلما اشفيت للمخلاص زاد انشبي
لاحني بالمحبة لوح من فوق شار
وين انا والسلامة ما قويت أحبي
وميت الحب دمه مهدرينه هدار
مت موت المطوع يوم شاف الظبي
با تشهد ولا أمداني بوضح النهار
لا يطالبه في دمي ثوير اعصبي
ومن يجي من اخواني طالب منه ثار
لا يثاري عيون تفدي المذهبي
وعاتق في بياضه مرتعٍ للحمار
لا يشوفه يموت ويفطنون اعربي
في عيوني تطاير مثل قدح الشـرار
بينهم غاديٍ كني تقول أجنبي
قلت للي كواني مخطرٍ منه حار
ناجحٍ كيك اللي في مكانٍ غبي
لا تخلي عشيرك بين جنة ونار
غض يقرب شوي وسوبه ما تبي
ناشعٍ قلبك اللي زاد سوه غيار
مثلما ينشع العفري موات حلبي
راعي الحكي خله يوم قر القرار
كان جاب الك هرج وازعلك فيهبي