سـر يا قلم
- الصفحة الرئيسية
- الاشعار
- إلى راشد
- سـر يا قلم
قصيدة للشاعر/ غالي شباب الصوينع موجهه للشاعر المحرر بمجلة اليمامة الاخ راشد بن جعيثن
سـر يا قلم وأكتب كلامٍ يسـرا
مثل العسل حلو الطعم صافي اللون
قولٍ إلى مرا الفهيم وتورا
يطرب لمعناً داخلٍ بيت موزون
ما هو كلامٍ بين حلوٍ ومرا
إيتوه الشعار واللي يعرفون
وإن كان بيت الشعر لا جاء يغرا
راحت بيوت الشعر من دون في دون
وقالوا رجال العرف ليته تبرا
الشعر من ناسٍ بدربة يضيعون
وأنا من النقاد دوم أتدرا
واخاف من ناس علي يتزرون
وأصبر لو أن الليل طول وسـرا
حتى القصيدة لا بدت ما يعذلون
وأشوف لي ناسٍ تقول وتزرا
وأقولهم بالهون يالربع بالهون
النقد من جاهل ترى ما يضـرا
والشعر له عند الرجاجيل قانون
وأنتم كما فارس يكر ويفرا
ولا هوب لا طاعن ولا هوب مطعون
ويا ليت بعض الشعر ما ينتطرا
يا محررين الصحف وشلون ترضون
الشعر تال الوقت شفته تعرا
ومن أولٍ بين الرجاجيل مصيون
العاقل اللي فالمعاني تحرا
أمثال راشد كامل العرف مأمون
أبن جعيثن قد قرأ ثم قرّا
تشهد له الشعار ياللي تخوضون
داس المخاطر فالبحر ثم برا
يقطف زهور الشعر وأنتم تذلون
ما ينطح العسـرات من لا تجرا
وانته طبيب القلب والقلب مشحون
يا بو محمد لا تهاب وتذرا
أضرب بحد السيف وأبليس ملعون
انته لها قاضي بخيرٍ وشـرا
شاعر وسيفك مع هل العرف مسنون
شعر: غالي شباب الصوينع