بساط أحمدي
- الصفحة الرئيسية
- الاشعار
- الغزل والرومانسيات
- بساط أحمدي
ودك على وجه الحكي نرسم حدود السالفه
والا على وجه البحر نفرش لك بساط أحمدي
تظلم وتحرق لهفتي في نار رغبه خايفه
مديت كفك للسما ولامس وجه الجدي
طعن الكلام ولعنته إنك تعرّف عارفه
والله ما أصدق واقتنع انك جهلت بمقصدي
الماء معك وزروع قلبي من ظماي مهايفه
صارت حياتي في يدك ما هو رسنها في يدي
فصَّل من الشاش الجليد ثوب الجبال النايفه
من شان في صحرا العطش تزرع لي الكف الندي
ينبت أمل والا همومٍ خيلها متحالفه
ضدي وتطعني كذا أواه من رمحٍ صدي
غوجك ينفض فوق راسي المنكسـر معارفه
متى تفكر بالعقل مثل العباد وتهتدي
حبك وطن والوصل يا عذب اللما مشارفه
وانا غريب ابلا وطن عطني هوية ببلدي
قضـى زها بي والركايب في طريقك تالفه
قل لي هلا والا بعد قل لي معك حظي ردي
همي وشعري والقلم راح العمر متوالفه
اجمع ثلاثٍ من عشـر واحفظ عددها المفردي