شيخ سبع الطوايف
- الصفحة الرئيسية
- الاشعار
- الاجتماعيات والاخوانيات
- شيخ سبع الطوايف
الاهداء: إلى أعشى قيس ... وثلاثة من الصعاليك ... والربع الخالي من الوطن ...
الله على اللي وردوه السلاطين
من مصنعٍ دونه رجال وحتايف
جمسٍ حمر ما رهموا له بلونين
حماره أطرا من حمار الشفايف
في مبسمٍ ما يستوي غير لثنين
عقيد وإلا شيخ سبع الطوايف
لا دق سلفه واشتغل به صلنصين
ما توحي إلا نشنشات الوشايف
جمسٍ يشوق العين بالمنظر الزين
ما داره إلا واحدٍ قال كايف
خمسه صفر واحد على الشاص رقمين
ما دخلوه إلا بتوقيع نايف
بالبيت الأبيض عاقدين اجتماعين
عقب السماح يكثرون الحسايف
في لوحته مع نخلة العز سيفين
شعار مروية الحدود الرهايف
وسامة مطقع على العسـر واللين
شوق البنات المترفات العفايف
اللي خذوها من كفوف الحفيفين
على ظهور ملافحات السفايف
جمس حمر ما ولفوا فيه عقدين
يروي ظما ضرم الكبود الحفايف
ليا نيش أبنصهه وأنطرق بين عرقين
ينهض مثل شيخ من الزوم عايف
أموردٍ ضده صناعة مجانين
واحد وواحد وأول الرقم فايف
أشـره بحر المال لو يلحقك دين
سق فيه ذودك والمهار العسايف
وعدة على ذيب السـرا يوم الإثنين
مولد رسول وأفضل ايام حايف
ليا نملت رجل الجبان المسيكين
وعرقت يده من طارة الجمس خايف
ليا راح وجه الليل كنا كحل عين
عده ويضـرب به طريقٍ مهايف
له عادةٍ ليا شافهم بين حدين
اما تجي وإلا على الله خلايف
شـرب القطاعة من لبن روس ثديين
ما كتب رزقه من فلوس الوظايف
15/2/1416 هـ