بين روحين
- الصفحة الرئيسية
- الاشعار
- الاجتماعيات والاخوانيات
- بين روحين
يا مل قلبٍ يفك الهم ويخمه
خمة عجوزٍ ولدها بين روحيني
قدام تزهق حياته قال يا يمه
ثم صفق من عظيم الوجد كفيني
طاحت على صدره اللي واقفٍ دمه
ويوم أذهنت جرت الونة بصوتيني
وقامت تخمخم يديه وجودت كمه
تبيه وأفخت وزاد الهم هميني
وعلى النعش يوم قفو به بني عمه
طاحت وقامت وهامت والهيم شيني
تدوي على ثوبه المنطول وتشمه
وتسقي جفاف الشحوب بدمعة العيني
من حر فرقاه ما تمشـي على يمه
ولا تعرف الأحد من يوم الأثنيني
وما ترقد الليل من حزنه ومن همه
والقلب كنه يطعن بالسكاكيني
كن المعزي يشوف عيونها يمه
أَتغيب وتذهن إلى جوها المعزيني
وجابوا لها اللي قرا بالمصحف وتمه
يقرا عليها من القرآن ياسيني
وأنا مع الناس كني من ورى الحمه
الناس عندي ولا أدري من يحاكيني
أوحي نبا العلم لكن كيف ما أضمه؟!
الله علم وين هاجوسي موديني
أرد على الهم ظامي وأشـرب الجمه
عليك يا للي توردني وتظميني
وتشوف حالي عقب ما طبت منسمه
وداوي بيديك لكن ما تداويني
أما وفا والوفا تبرا به الذمه
وإلا جفا والجفا موتٍ يباريني