راكبٍ اللي مثل برقٍ سـرى له في سحاب
ما تحق العين شوف الهميم المنتحي
يوم روح يبدي شوي للعين ويغاب
ما ينوش الأرض خفه يبين ويمحي
في رهاريه المبادي يزم به السـراب
من صلا شوف المخايل تحسبه مستحي
لي عطاله خبةٍ في حديد الشوف ذاب
في سـرابٍ بالفياح البعيد الأبرحي
قفله راعيه من عقب راهية الوجاب
للحصا من تحت خفه مثل قضم اللحى
من تخاتيخ الخلا ما يجض ولا يهاب
راكزٍ راسه تقول ايتلقى له وحي
غاية اللي ما عطوه السموحه لنتداب
أشعلٍ ما سـربه عرق عفرا وأملحي
البراطم فوقها مثل صافية الثياب
شاش أبيض والزبد من ضريسه بالرحي
منوة اللي ما معه لا خوي ولا زهاب
أيمنٍ ما هوب عمه وخاله وحوحي
وارثٍ من راس جده عزيمه واحتزاب
لو تطول به المساري على الطرقه صحي
من صوابه دله الله على فعل الصواب
والمراجل يا بن جدلان راس المربحي
اشهد إنك شاعرٍ كان للشعر احتساب
يا بنات الريح شيشـي بقافي وألفحي